A Torre de Hércules é o faro romano máis antigo do mundo e o único que permanece en servizo. Construída probablemente na segunda metade do século I, por un arquitecto de Coimbra chamado Gaio Sevio Lupo, a súa luz foi sempre un referente para os mariñeiros.
Atópase nun outeiro a 60 metros sobre o nivel do mar, e cunha altura de 59 metros, érguese o símbolo da cidade da Coruña.
O revestimento exterior actual é do século XVIII, obra de Eustaquio Giannini.
Dende a súa base e despois de subir os seus 234 chanzos, chégase ao miradoiro desde onde se contempla unha espectacular vista da Coruña. Ao lonxe as rías de Sada e Betanzos, Ares e Ferrol e ao oeste, as Illas Sisargas fronte a Malpica.